Nk’uko bimenyerewe cyane cyane mu bihugu by’i Bulayi, umwaka wa politiki (la rentree politique)utangirana n’ukwezi kwa Nzeli(9). N’ubwo abayobozi b’Ishyaka Ishema bahora bari maso ndetse bakaba badafata ibiruhuko birebire (Vacances), muri iyi minsi bakoze inama zikomeye zitegura uyu mwaka mushya wa politiki dutangiye. Izo nama zemeje imirongo migari Ishyaka Ishema rizashingiraho ibikorwa byaryo binyuranye :
(1) Kuvugurura no kunoza imikorere y’ inzego z’Ishyaka
(2) Kunoza ingamba n’intego
(3)Imyiteguro ihamye yo kuzagira uruhare mu matora y’umukuru w’igihugu yo mu 2017
(4)Ingendo z’Umukandida w’Ishema Party zigamije kurushaho kumenyana n’Abanyarwanda
(5)Gushyigikira iterambere rya Mouvance ya “Nouvelle Generation”
(6)Gutanga umuganda ugaragara mu kuvutsa Opozisiyo nyarwanda yunze ubumwe kandi ifite ingufu.
(7)Kwakira Amakipe Ishema mashya akomeje kuvuka mu Rwanda no mu bindi bihugu.
Kuri iyi ngingo ya nyuma, tuboneyeho akanya ko guha ikaze amakipe abiri aherutse kuvuka i Maputo mu gihugu cya Mozambique n’i MANZINI mu gihugu Swaziland.
Nk’uko ayo makipe yombi yabyifuje, muri uyu mwaka azaba ahagarariwe, ku mugaragaro, na Nyakubahwa Padiri Gaspard NTAKIRUTIMANA.
Ikipe Nyobozi y’Ishyaka Ishema, mu nama yayo yo ku cyumweru taliki ya 31/ 8/ 2014 , ikaba kandi yaremeje ko Padiri Gaspard NTAKIRUTIMANA ari we uhagarariye Ishyaka Ishema muri Afurika yose y’Amajyepfo, guhera ku italiki ya 1 /9/2014.
Tumwakiranye ibyishimo nk’UMUTARIPFANA ufite ubushake bushyitse n’ubutwari budashidikanywaho bwo gutanga umuganda we mu rugamba rwo kwamagana ingoma ya FPR-Inkotanyi yiyubakiye ku karengane, ikinyoma, irondakoko n’iterabwoba hagamijwe gufasha Abanyarwanda kwishyiriraho ubutegetsi bwubakiye ku ndangagaciro z’Ubwigenge bw’abana b’Imana, Ukuri n’Ugusaranganya neza ibyiza byigihugu.
Turasaba Abanyarwanda batuye igice cy’amajyepfo y’Afurika, bakaba bibona mu migambi myiza y’Ishyaka Ishema, ko bakwegera Padiri Gaspard NTAKIRUTIMANA,bakaganira. Mushobora kumubona kuri telefoni ye igendanwa : 00268076801815. Cyangwa mugakoresha email : gaspardnt@yahoo.fr.
Ishema ni iryawe nanjye,
Ishemani iryacu twese.
Padiri Thomas Nahimana
Umuyobozi w’Ishema Party.
